Вашингтонда АҚШ давлат котибининг Марказий Осиё мамлакатлари ТИВ раҳбарлари билан учрашуви бўлиб ўтади
Тошкент. 2 август. ЎзТАГ – Марказий Осиёнинг беш мамлакати, шу жумладан, Ўзбекистон, ташқи ишлар вазирлари ва АҚШ давлат котиби Жон Керри 3-август куни Вашингтон шаҳрида “C5+1” шаклидаги вазирлар учрашувида иштирок этадилар, деб хабар беради Ўзбек телеграф агентлиги (ЎзТАГ).
Мазкур ташаббуснинг мақсадлари ҳақида гапириб бериш учун АҚШ давлат котибининг Марказий Осиё бўйича ёрдамчиси ўринбосари Дэниел Розенблюм томонидан телефон матбуот-брифинги ташкил этилди.
Унинг таъкидлашича, Вашингтондаги учрашув “C5+1” шаклидаги иккинчи учрашув бўлади.
“Бу ўтган йилнинг ноябр ойида Самарқандда ташкил этилган мулоқотнинг давоми бўлади. “C5+1” шакли дипломатик мулоқотнинг бир шакли бўлишига қарамасдан биз бундан кейин у янада ривож топиб, минтақа мамлакатлари олдида турган вазифаларни муҳокама қилиш мумкин бўлган асосга айланишини истаймиз. Вашингтондаги учрашув бу йўналишдаги муҳим қадам бўлади деб ўйлаймиз”, - деди америкалик сиёсатчи.
