Владимир Путин февралда Тошкентга ташриф буюришни режалаштирмоқда
Тошкент. 6 феврал. ЎзТАГ – РФ президенти Владимир Путин февралда Тошкентга ташриф буюради, деб хабар қилади ЎзТАГ.
“Россия президенти Владимир Путин февралда Марказий Осиё бўйлаб сафарда чиқади. У Тожикистон ва Қирғизистонга, ва эҳтимол, Қозоғистон ва Ўзбекистонга ҳам ташриф буюради”, - дейилади душанба куни “Лента.ру” эълон қилган хабарда.
Таъкидланишича, Москва ушбу республикаларнинг ҳар бири билан яқин сиёсий ва иқтисодий алоқаларни сақлаб қолишга ҳаракат қилмоқда, бироқ, уларнинг ҳар бири билан ҳал қилинмаган масалалар мавжуд. “Агар Путин тўрттала мамлакат пойтахтига ташриф буюрса, бу сўнгги йилларда Россия давлат раҳбарининг минтақа бўйлаб энг йирик сафари бўлади”, - дейилади хабарда.
Маълум қилинишича, кун тартибининг асосий масалалардан бири – ҳарбий-техник ҳамкорликдир.
Агентлик маълумотига кўра, 2016 йил ноябрь ойида Ўзбекистон ва Россия 2017 йилги ҳарбий-техник ҳамкорликни ривожлантиришга доир шартномани имзолади. Бундан ташқари, Ўзбекистон Қуролли кучларини Россиянинг замонавий қурол-яроғлари ва ҳарбий техникалари билан қайта жиҳозлаш бўйича 2020 йилгача бўлган дастур амалга оширилмоқда.
Олдин хабар қилингани каби, ундан олдинроқ РФ президенти матбуот котиби Дмитрий Песков “Известия” нашрига Шавкат Мирзиёев яқин 2-3 ой ичида Россияга ташриф буюришини маълум қилган эди. Ўзбекистон ва РФ раҳбарияти музокараларда энергетика, қишлоқ хўжалик маҳсулотларини етказиб бериш, ҳарбий-техник ҳамкорлик ва муҳожирлик сиёсати масалалари муҳокама қилиши кутилмоқда.
Эслатиб ўтамизки, В.Путин ва Ш.Мирзиёев 2016 йилнинг сентябрида қисқа муддатли музокаралар ўтказишган эди. Ўшанда Россия президенти Хитойдан қайтиши чоғида Самарқанд шаҳрига қўниб, Ўзбекистоннинг биринчи Президенти Ислом Каримов қабрига гуллар қўйган эди.
