Wall Street Journal швейцар прокурорлари Гулнора Каримовани сўроқ қилгани ҳақида хабар берди
Тошкент. 16 январ. ЎзТАГ – Швейцария прокурорлари Ўзбекистоннинг биринчи президентининг қизи Гулнора Каримовани коррупция иши бўйича сўроқ қилди, деб хабар беради Wall Street Journal нашри.
Нашрнинг сўроқда қатнашган юристнинг сўзларига асосланиб берган маълумотига кўра, учрашув Каримова хибсда сақланаётган Тошкентда бўлиб ўтган.
Каримованинг ҳимоячиси этиб тайинланган швейцар адвокати Грегуар Манжеа прокурорлар унинг мижози билан икки марта 9 ва 10 декабрда учрашгани ҳақида маълум қилган. Сўроқ жами 23 соат давом этган.
Адвокатнинг сўзларига кўра, Каримовага ташқи олам билан алоқа қилиш таъқиқланган. Прокуратуранинг Швейцариянинг Берндаги вакили нашрга муассаса ходимларининг Ўзбекистонга борганини тасдиқлаган.
Шу билан бирга вакил тергов жараёни тафсилотларини очиқлашдан бош тортган.
Эслатиб ўтамизки, Гулнора Каримова 2014 йилдан бери оммага кўринмаяпти. Хусусан, у отасининг дафн маросимида иштирок этмаган. Олдинроқ Каримова мамлакатдаги юқори лавозимдаги шахслар номига ножўя ҳаракатлар қилгани боис уй қамоғига солингани ҳақида хабар қилинган эди. Жорий йилда Швейцария унга нисбатан пулларни ўзлаштириш ва коррупция жиноятлари бўйича жиноий иш очилгани ҳақида хабар қилди.
