Йўқолган ўзбекистонликнинг жасади Москва яқинидаги ўрмондан топилган
Тошкент. 11 октябрь. ЎзТАГ – Йўқолган ўзбекистонликнинг жасади Москва яқинидаги ўрмондан топилган, дея хабар беради Ўзбек телеграф агентлиги (ЎзТАГ).
"Россиядаги Ўзбекистон элчихонасининг берган маълумотига кўра, 2019 йил 8 октябрда Москва вилояти Люберецкий тумани ҳудудидаги ўрмондан Ўзбекистон фуқароси Х.Б. жасади топилган", - дейилади Ташқи ишлар вазирлиги матбуот хизмати (ТИВ) хабарида.
Қайд этилганидек, элчихонада 2 октябрь куни Томилин электрон заводи объектларидан бирининг қулаши оқибатида ўзбекистонлик вафот этгани ва унинг раҳбарлари бу ҳақиқатни яширишга ҳаракат қилаётгани ҳақида маълумот олинди.
"Элчихона ҳуқуқни муҳофаза қилиш органларига расман мурожаат қилди ва генконсул Ўзбекистон Республикаси бандлик ва меҳнат муносабатлари вазирлигининг ташқи меҳнат миграцияси масалалари агентлиги ваколатхонаси раҳбари билан биргаликда воқеа жойига жўнаб кетди. Тергов органлари қидирувни ташкил қилишди ва марҳумнинг жасади объектдан 5 км узоқ масофада топилди", – дейилади хабарда.
Айни пайтда тергов ва тезкор қидирув ишлари давом этмоқда. Элчихона вазиятни назорат остида ушлаб туради ва марҳумнинг жасадини ўз ватанига қайтаришнинг консуллик-ҳуқуқий ва ташкилий масалаларини ҳал қилади.
Сурат манбаи: topre.ru
