Яқин орада Ўзбекистонда қиймати $87 млнлик ЭУЛ ишга туширилади

Тошкент. 23 июн. ЎзТАГ – Яқин икки ойда Ўзбекистонда қиймати $87 млнлик Сирдарё ИЭС – Янги Ангрен ИЭС юқори вольтли электр узатиш линиясини (ЭУЛ) ишга тушириш режалаштирилмоқда. Линиянинг қуввати 500 кВ, узунлиги эса 123,2 кмга тенг, деб хабар беради Ўзбек телеграф агентлиги (ЎзТАГ).

“Янги линия Фарғона водийси электр истеъмолчиларини электр қуввати билан таъминлаш барқарорлигини оширишга имкон беради, шунингдек, Марказий Осиё Бирлашган энерготизимидан Фарғона узелига қувватлар етказиб беришни таъминлайди. Объект ишга туширилганидан кейин электр қувватини ташишдаги йўқотишларнинг камайиши ҳисобига 75 млн кВт соат электроэнергия тежаб қолинади. Кейинчалик, ушбу линия бўйлаб узатиладиган электр қувватининг ошиши баробарида 180-185 млн кВт соат электр қуввати тежалади”, – деб таъкидлади “Ўзбекэнерго” ДАК манба.

Лойиҳанинг умумий қиймати $87 млн ошиқни ташкил қилиб, бундан $33 млн маблағ хитойнинг “Эксимбанк”и, қолган қисми “Ўзбекэнерго” компанияси томонидан киритилди.