Яманда ўғирланган ўзбекистонлик шифокорни озод қилишга эришилди
Тошкент. 21 апрель. ЎзТАГ – Яман ҳукумати ўтган ҳафта мамлакатнинг Мариб вилоятида қуролланган шахслар томонидан ўғирлаб кетилган Ўзбекистонлик шифокорни озод қилишга муваффақ бўлди, дея хабар беради Рейтер агентлиги маҳаллий ҳукуматга асосланган ҳолда.
Агентликка маҳаллий ҳукумат вакили хабар беришича, воситачилар ўғирловчилар – маҳаллий қабилага мансуб қуролланган эркаклар билан шифокорни озод қилиш ҳақида келишувга эришишга муваффақ бўлганлар.
“У воситачиларга топширилган ва улар томонидан Марибга олиб келинган ва бу ерда шифокор маҳаллий маъмурият вакиллари томонидан кутиб олинган”, – деган агентлик манбаси. Айни вақтда, шифокор учун товон пули тўланган ёки тўланмаганлигига аниқлик киритилмаган.
Эслатиб ўтамизки, 2011 йилдан кейин Яманда тинчликпарвар ҳукумат алмашганидан кейин беқарор вазият сақланиб қолмоқда. Ҳукумат томонидан вазиятни барқарорлаштиришга қаратилган чоралар кўрилишига қарамасдан, мамлакат жанубида «Ал-Қоида» жангарларининг террористик актлари тинмаяпти. Улар мунтазам равишда Яманнинг нефть ва газ объектларига ҳужум қилишмоқда. Ушбу ҳужумлар Яман ғазнасига бир неча миллиард доллар зарар етказди.
13 апрель куни қуролланган гуруҳ Мариб шаҳридаги шифохоналардан бирида ишлаётган хорижлик шифокорни қўққисдан ўғирлаб кетгани ҳақида хабар қилинган эди. Унга кўра, ҳарбийча кийинган номаълум шахслар шифокорни Toyota автомобилига солган ҳолда номаълум йўналишда олиб кетганлар. Яман ички ишлар вазирлиги маълумотларига кўра, шифокор Яманга Россиядан келган, бироқ кейинроқ унинг Ўзбекистон фуқароси эканлиги маълум бўлган эди.
