Японлар “Ўзбекэнерго”га консалтинг хизматлари кўрсатадилар
Тошкент. 19 январ. ЎзТАГ – Япониянинг TEPSCO (Tokyo Electric Power Services Co.) корпорацияси “Ўзбекэнерго” билан Наманган вилоятидаги Тўрақўрғон иссиқлик электр станциясининг (ИЭС) қурилишида консалтинг хизматларини кўрсатиш борасида шартнома имзолади. Бу ҳақида маҳаллий ОАВ хабар қилмоқда.
“Газета.uz”га “Ўзбекэнерго” компаниясида маълум қилишларича, консалтинг хизматлари технологик, молиявий ва ишлаб чиқаришни амалга ошириш ва лойиҳалаштириш юзасидан назорат соҳаларини қамраб олади.
Эслатиб ўтамизки, 2013 йил августида “Ўзбекэнерго” 900 МВт қувватга эга Тўрақўрғон ИЭСининг қурилишини бошлаган эди. Лойиҳа йилига 7 млрд кВт/соат электр энергия ишлаб чиқарувчи станциянинг қурилишини кўзда тутади.
Ўтган йил декабрда бу ерда қуввати 450 МВтлик икки газбуғ қурилмасини барпо этиш бўйича асосий пудратчини танлаш бўйича тендер эълон қилинган эди. Тендер якунлари шу йилнинг биринчи ярмида кўриб чиқилади. Биринчи энергоблокни 2018 йилда, иккинчисини 2019 йилда фойдаланишга топшириш режалаштирилмоқда.
Қиймати $1,1 млрдлик лойиҳани молиялаштириш Япон халқаро ҳамкорлик агентлигининг (JICA) $704 млн кредити, Ўзбекистон Тикланиш ва тараққиёт жамғармасининг $300 млн маблағи ва “Ўзбекэнерго”нинг ўз маблағлари ҳисобига амалга оширилади.
