“Яримфиналга чиқиш истаги кучли бўлганига қарамасдан, бунга эриша олмадик” – Миржалол Қосимов

Тошкент. 30 январ. ЎзТАГ – “Яримфиналга чиқиш истаги кучли бўлганига қарамасдан, бунга эриша олмадик”, деб таъкидлади Ўзбекистон миллий термасининг бош тренери Миржалол Қосимов терма жамоанинг 2015 йилги Осиё Кубогидаги иштироки якунлари ва 2015 йил режаларига бағишланган матбуот анжуманида, дея хабар беради Ўзбек телегаф агентлиги (ЎзТАГ).

Ўзбекистон Футбол федерацияси (ЎФФ) маълумотларига кўра, матбуот анжумани 29 январ куни ЎФФ мажлислар залида бўлиб ўтган. Унда, шунингдек, республика Терма жамоалари маркази директори Асқар Толибжонов ҳам қатнашди.

“Биз Осиё Кубогида муносиб иштирок этишни мақсад қилган эдик. Аммо, чоракфиналда омад кўпроқ рақиб томонида бўлди. Аммо, салбий натижага қарамасдан, Жанубий Кореяга қарши ўйинда гол ура олмаган бўлсак ҳам, улардан ёмон ўйнамадик. Мен ҳеч бир футболчини ўз вазифасига ёмон муносабатда бўлди, деб айблай олмайман. Яримфиналга чиқиш истаги кучли бўлганига қарамасдан, бунга эриша олмадик. Шу сабабли ушбу натижа учун бизга ишқибозлик қилган Ўзбекистон аҳолисидан узр сўрайман”, - деб таъкидлади бош мураббий.

“Бизда истеъдодли ёшларимиз кўп. Улар учун Осиё Кубоги катта тажриба мактаби бўлди. Бундай ўйинлар терма жамоа келажаги учун фойдали. Мағлубиятда эса айнан кимнидир айблаш ноўрин. Масалан, Лутфулла Тўраев вазиятдан фойдаланганида қаҳрамон бўлиши мумкин эди”, - деб қўшимча қилди М.Қосимов.

Эслатиб ўтамизки, Австралияда бўлиб ўтаётган қитъа биринчилигида Ўзбекистон термаси чоракфинал ўйинида Жанубий Кореяга 2:0 ютқазди.