Йирик беларус суғуртачиси ўзбек бозорига маҳаллий ҳамкор билан бирга чиқмоқда
Тошкент. 16 июл. ЎзТАГ – “Ўзбекинвест” экспорт-импорт миллий суғурта компанияси (ЭИМСК) ва “Белэксимгарант”(Беларусь Республикаси) компанияси қайта суғурталаш ҳақида шартномаси имзоладилар, деб хабар беради Ўзбек телеграф агентлиги (ЎзТАГ).
“Ўзбекинвест”дан хабар қилишларича, хужжат икки мамлакат ўртасида икки томонлама ҳамкорлик бўйича ҳукуматлараро комиссиясининг тўртинчи қўшма йиғилиши баёни ижросини таъминлаш мақсадида имзоланган. “Белэксимгарант” Беларуснинг энг йирик суғурта компанияларидан бири ҳисобланади ва 50дан ортиқ суғурта хизматлари кўрсатади. Унинг стратегик мақсади – экспортни рағбатлантириш орқали мамлакат иқтисодиётини ривожлантиришдан иборат.
Бугунги кунда “Ўзбекинвест” компанияси суғурта бозорининг Marsh (АҚШ), ENC Plus Insurance Brokers (Корея), Zurich, Societe de Courtage Re (Швейцария), Skala, Malakut, Glinso, Росгосстрах (Россия), United Insurance Brokers, InRe, Allianz, HDI-Gerling (Германия), Cooper Gay, Willis, NDI Insurance & Reinsurance (Буюк Британия) ва AXA Corporate Solutions каби таниқли ширкатлари билан ҳамкорлик қилмоқда.
