Ўзбек амалдорлари электрон давлат хизматларини жорий қилиш бўйича халқаро тажрибани ўрганадилар
Тошкент. 23 июн. ЎзТАГ – Тошкент шаҳридаги Инҳа университетида Ўзбекистондаги давлат органлари ходимлари учун бизнес-жараёнларнинг реинжиниринги бўйича тренинг бошланди, деб хабар беради Ўзбек телеграф агентлиги (ЎзТАГ).
Тренингни Корея ахборот жамиятини ривожлантириш институтининг (KISDI) халқаро эксперти Минжу Но ўтказмоқда.
“Мазкур билимлар аҳоли ва бизнесга давлат хизматларини кўрсатиш тартибини такомиллаштириш, хизматлар рақамлаштирилиб, Ягона интерактив давлат хизматлари портали (ЯИДХП) платформасига киритилгунга қадар идоралараро ўзаро алоқаларни яхшилаш учун зарур ҳисобланади. Реинжинирингни ўтказиш мажбурий чора ҳисобланиб, эскирган ва самарасиз жараёнларга АКТни татбиқ этишга кетадиган харажатларни тежаб қолиш имкониятини беради”, - деб таъкидлашди Ахборот технологияларини ривожлантириш вазирлигида.
Тренинг давомида қатнашчилар бизнес жараёнларидаги реинжиниринг бўйича ўз малакаларини қуйидаги давлат хизматларида синаб кўришлари мумкин: бизнесни рўйхатга олиш, кўчмас мулкни рўйхатга олиш, кўчмас мулк олди-сотдиси, даромадлар тўғрисида солиқ декларациясини тақдим этиш ва дарахтларни кесишга рухсат олиш.
Тренинг қатнашчилари беш гуруҳга (давлат хизматларига қараб) ажратилган бўлиб, уларнинг ҳар бирига таҳлилчилар, ҳуқуқшунослар, АКТ ва жамоатчилик билан алоқалар бўйича мутахассислар киритилган.
Тренинг якунида иштирокчилар хизмат кўрсатиш бўйича ўзларининг оптималлаштирилган талқинларини тақдим этишади, уларнинг натижаларига кўра қонунчилик базаси ва инфратузилмани такомиллаштириш бўйича аниқ таклифлар киритилади.
