Ўзбек автоконцерни харидорларнинг буюртмалари бўйича газда ишловчи автомобиллар ишлаб чиқаради
Тошкент. 29 июн. ЎзТАГ – GM Uzbekistan ўзбек-америка ҚК харидорларнинг буюртмалари бўйича газ баллон ускуналари (ГБУ) билан жиҳозланган автомобиллар ишлаб чиқаради, деб хабар беради Ўзбек телеграф агентлиги (ЎзТАГ).
“Ўзавтосаноат” АК матбуот хизмати маълумотларига кўра, ГБУ фақат эгалари дилерлик корхонасида расмийлаштиришда шундай ускуна ўрнатишни истаган машиналарга ўрнатилади.
Хабарда газ баллон ускуналарига кафолат ҳам берилиши кўрсатилган. ГБУ Avtosanoat-Landi Renzo ўзбек-итальян ҚК етказиб беради.
Бундан олдин 2015 йилнинг тўртинчи чорагидан бошлаб GM Uzbekistan газ баллон ускуналари билан жиҳозланган “Lacetti” автомобилини ишлаб чиқаришни режалаштираётган хабар қилинган эди. Жорий йилнинг баҳорида эса ЎзТАГ ГБУ завод томонидан ишлаб чиқарилаётган деярли барча моделларга қўйилиши ҳақида хабар берган эди (Captiva жипидан ташқари).
Эслатиб ўтамизки, Avtosanoat-Landi Renzo ҚК “Навоий” ЭИСҲ 2014 йил июнда ташкил этилган. Унинг таъсисчилари “Ўзавтосаноат” акционерлик компанияси ва италиянинг Landi Renzo S.p.A. компанияси.
Landi Renzo S.p.A. – автотранспорт воситаларига суюлтирилган нефть гази ва метандан муқобил ёқилғи манбалари сифатида фойдаланиладиган ускуналар ишлаб чиқариш бўйича дунёдаги етакчи ишлаб чиқарувчидир. Лойиҳага киритилган бирламчи инвестициялар $1,8 млнни ташкил қилган. Уни амалга ошириш доирасида ишлаб чиқаришни локализация қилиш ҳам кўзда тутилмоқда. Компания маҳсулотлари GM Uzbekistanнинг бутун Ўзбекистон бўйлаб ишловчи 74 дилерларига етказиб берилмоқда.
