Ўзбек автомобиллари Россиядаги энг арзон автомашиналар рўйхатига кирди
Тошкент. 7 ноябр. ЎзТАГ. GM-Uzbekistan компаниясида ишлаб чиқарилган автомобиллар Россиядаги энг арзон машиналар рўйхатида биринчи ўринни эгаллади, дея хабар беради Ўзбек телеграф агентлиги (ЎзТАГ) “Автостат” таҳлилий агентлиги тадқиқотига асосланган ҳолда.
“Россиядаги энг арзон автомобиллар – Daewoo автомобилларидир. Уларнинг ўртача нархи 2012 йилда $9,5 мингни ташкил қилган. Ушбу ўзбек-корейс бренди нархларини $10 минггача миқдорда ушлаб турган ягона маркадир”, – деб таъкидланади агентлик хабарида.
“Автостат” таҳлилчиларининг сўзларига кўра, бундаги асосий омил ультрабюджет сегментига мансуб Matiz ва Nexia моделларидир, ушбу автомобилларнинг нархи 200 минг рублдан бошланиб, 400 мингга етмайди.
Агентлик рўйхатига кўра, Россиядаги энг қиммат автомобиль маркалари Mercedes Benz, Land Rover, Lexus, BMW, Audi, Volvo, Toyota, Subaru, Honda ва Mitsubishi маркаларидир. Нархи энг арзон автомобиль маркалари рўйхати Daewoo, Lada, Lifan, Chery, Renault, Chevrolet, Citroen, Great Wall, Peugeot ва Hyundai маркаларидан ташкил топган.
