Ўзбек банклари автомобиль сотиб олишга кредитлар беришни тўхтатди
Тошкент. 19 июл. ЎзТАГ – Ўтган ҳафта ўзбек банклари GM Uzbekistanда ишлаб чиқарилган автомобилларни сотиб олишга кредитлар беришни тўхтатди, деб хабар беради Ўзбек телеграф агентлиги (ЎзТАГ).
Centralasian.org нашрига “Асака банк” вакилларининг берган маълумотига кўра, бу Марказий банкнинг оғзаки кўрсатмасига биноан амалга оширилган.
GM Uzbekistan раҳбариятига яқин амалдорнинг айтишига кўра, июл бошида компания Асакадаги автомобиль заводи билан биргаликда автомобилларни кредитга сотиш бўйича янги дастурни очган. Паст фоизлардаги автокредит GM Uzbekistan фаолиятини жонлантиришга хизмат қилиши мумкин эди.
“Кредитлар бериш атига беш кун давом этди. Қисқа муддатда жуда оз киши кредитга автомобиль ола олди. Яна бир неча минг киши навбатда турган эди. Ўтган ҳафта барча банклар Марказий банк кўрсатмасига биноан автокредит беришни тўхтатган. Бу ўзбек автосноати учун жуда катта зарба бўлди”, - деди у.
Кредит олганлардан бири автомобилнинг 25% тўлаб, авто калитини қўлга киритган. “Кредитни 3 йил давомида ёпиш керак. Йиллик фоиз ставкаси 18%, уни ойма ой ёпишим зарур”, - деди нашр суҳбатдоши.
Молия соҳасидаги яна бир ўзбек амалдорининг сўзларига кўра, ҳозирда Ўзбекистон банклари кредит портфелидан келиб чиқиб, кредит беришга қодир эмас. “Бугунда истеъмол кредитлари давлатнинг бирламчи вазифаси эмас. Лекин кредит бериш жараёни банклар ўзларини бир оз ўнглаб олганларидан кейин қайта бошланиши мумкин”, - дейди ўзбек амалдори.
