Ўзбек боксчиси жаҳон чемпионлигига даъвогарни техник нокаут билан мағлубиятга учратди

Тошкент. 5 октябр. ЎзТАГ – Ўзбекистонлик 25 ёшар профессионал боксчи Улуғбек Ҳакбердев россиялик жаҳон чемпионлигига даъвогар Дмитрий Сухотскийни техник нокаут билан мағлубиятга учратди, деб хабар беради Ўзбек телеграф агентлиги (ЎзТАГ).

Ўзбекистон Бокс федерацияси маълумотига кўра, Троицк (Россия) шаҳрида бўлиб ўтган жанг ўзбекистонлик спортчининг профессионал боксдаги тўртинчи жанги эди.

Эслатиб ўтамизки, 36 ёшли Сухотский профессионал бокс 23 жангда ғалаба қозонган, 16 баҳсда рақибларини нокаутга учратган ва 5 марта енгилган. Уч йил аввал Дмитрий канадалик Адонис Стевенсондан WBC жаҳон чемпиони унвони учун курашда енгилган.

Рақибининг катта тажрибасига қарамасдан У. Ҳакбердев Дмитрийни биринчи раунддаёқ нокдаунга жўнатди. Сухотский рақибига бардош бера олмагач, унинг мураббийлари 7-раундда курашни якунлашни илтимос қилдилар.

Шундай қилиб, ўзбек боксчиси кетма-кет тўртинчи ғалабани қўлга киритди.