Ўзбек дастурчилари навбатдаги компьютер ўйинни тақдим қилдилар
Тошкент. 3 июл. ЎзТАГ – ZiyoNET ўзбек таълим порталида CronForge компанияси томонидан ишлаб чиқалган “Кроникнинг саргузаштлари” номли янги ўйин пайдо бўлди. Уйиннинг сюжетига кўра, ўйинчи Кроник исмли персонаж ёрдамида йўқолиб қолган интернетни тиклаш учун модем қисмларини топиб, улардан бутун модем йиғиши керак, дея хабар беради Ўзбек телеграф агентлиги (ЎзТАГ).
Uzinfocom марказидан хабар беришларича, янги онлайн ўйин нимаси биландир машҳур Mario ўйинини эслатади. Бу ерда ҳам югуриш, хавфли махлуқлар устидан сакраш ва деталлар йиғиш зарур. Янги ўйин барча ёшдагиларга мўлжалланган.
Ўйин сюжети асосида – бутун шаҳарда интернетнинг йўқолиши ҳодисаси ётади. Кроник эса ана шу ёмон жиноятни қилган ёвузни топишда ёрдам беради ва адолатни тиклаб, интернетни қайтаради.
Ўйинчи Кроник учун ўйнаб, унга ҳар даражада йўқолган модемнинг қисмларини топишга ва ўйин сўнгида шаҳар аҳолисига интернетни созлашда ёрдам бериши зарур. Ўйинни рўйхатдан ўтмасдан туриб ҳам ўйнаш мумкин. Лекин рўйхатдан ўтган ўйинчи ўйинчилар рейтингида иштирок этиши мумкин бўлади.
Июл ойи бошига келиб, ZiyoNET порталида жойлаштирилган ўйинлар сони 410га етди. Улардан 379таси Ўзбекистондаги Британия кенгаши томонидан тақдим этилган инглиз тилини ўрганишга доир ўйинлардир.
