Ўзбек дастурчиси “компьютер доска”сини ишлаб чиқди
Тошкент. 26 май. ЎзТАГ – Ўзбек дастурчиси Фархат Ражабов “компьютер доска”сини ишлаб чиқди, деб хабар беради Ўзбек телеграф агентлиги (ЎзТАГ).
Мамлакат Интеллектуал мулк агентлигидан хабар беришларича, ишланма ўрта махсус таълим ва бошқа ўқитиш соҳалари учун мўлжалланган.
Дастур компьютер ёрдамида маъруза ва тақдимот қилиш жараёнини оддий доскада ишлаш кўринишига яқинлаштириб, янги ўқитиш технологиялари билан бойитади.
Дастур махсус чизгич “бўр” ёрдамида экранли досканинг исталган жойида қўлда ёзиш, махсус маркер ёрдамида экран қисмларини рангли қилиб ажратиш, экранда тезда оддий примитив шаклларни (чизиқ, тўртбурчак, эллипс ва ҳ.к.) чизиш имконини беради.
Шунингдек, дастур махсус “прожектор” ва “парда” ёрдамида экраннинг керакли жойини ёритиш ёки кераксиз жойларини яшириш, галереядан, фан ва техника йўналишидаги расмлари ишлатиб, тезда кўринишлар яратиш, экран кўринишларини эслаб қолиб, керак вақтда тезда кетма-кет қайта кўрсатиш, маъруза (тақдимот) жараёнини видеофильм шаклида ёзиб олиб, қайта кўрсатиш каби функционал имкониятларга эга.
