Ўзбек депутатлари ҳудудларга йўл олдилар

Тошкент. 2 июн. ЎзТАГ – 2 июнда Ўзбекистон Республикаси Олий Мажлис Қонунчилик палатаси депутатлари ҳудудларга чиқиб кетдилар, деб хабар беради Ўзбек телеграф агентлиги (ЎзТАГ).

Депутатлар Қорақалпоғистон Республикасининг Тўрткўл тумани, Андижон, Бухоро, Жиззах, Навоий, Наманган, Самарқанд, Сирдарё, Сурхондарё, Тошкент, Фарғона, Хоразм, Қашқадарё вилоятларининг Балиқчи, Қоракўл, Зафаробод, Конимех, Поп, Қўшрабод, Мирзаобод, Шеробод, Оққўрғон, Риштон, Боғот, Касби ва Тошкент шаҳрининг Шайхонтоҳур туманларига ташриф буюрадилар.

“10-12 кун давом этадиган учрашувларда депутатлар уй-жой коммунал, йўл-транспорт, тиббиёт, таълим соҳаларидаги ҳақиқий аҳволни ўрганадилар. Шунингдек, тадбиркорликни ривожлантириш, банк, савдо, маиший хизмат кўрсатишнинг сифатини, аҳолини бандлигини таъминлаш бўйича амалга оширилаётган ишларни таҳлил қилиш режалаштирилган”, - деб таъкидлашди парламент қуйи палатаси матбуот хизматида.

Ўрганишлар жараёнида аниқланган барча камчиликлар тегишли Халқ депутатлари кенгашларида масъул тузилмалар раҳбарлари иштирокида атрофлича муҳокама этилади. Бу каби иш тартиби масалаларнинг аксарият қисмини жойларда ҳал қилиш имкониятини беради, қолганлари эса парламент назоратига олинади.