Ўзбек “Дримлайнер”и биринчи рейсини амалга оширди

Тошкент. 6 сентябр. ЎзТАГ – “Ўзбекистон ҳаво йўллари” Миллий авиакомпаниясининг Boeing 787 Dreamliner самолёти республика ичидаги йўналишлар бўйлаб биринчи рейсини амалга оширди, деб хабар беради Ўзбек телеграф агентлиги (ЎзТАГ).

“Биринчи рейс Тошкент-Урганч-Бухоро-Тошкент маршрути бўйича амалга оширилди. У йўловчилар билан деярли тўлиқ бўлди. Аввалбошда лайнер ички рейсларни амалга оширади, унинг доирасида экипажнинг биргаликдаги ҳаракатлари машқ қилинади”, – деб таъкидлашди авиакомпанияда.

Яқин ҳафтада самолёт Тошкент-Навоий-Урганч-Тошкент, Тошкент-Навоий-Нукус-Тошкент йўналишлари бўйлаб учади.

Маълумот ўрнида, Ўзбекистон илк Boeing 787 Dreamlinerни 31 август куни қабул қилиб олди. Уларни етказиб бериш шартномаси 2008 йилда имзоланган эди.

Учишлар олис Жанубий ва Шимолий Америка йўналишларида амалга оширилади.