Ўзбек экспортчилари валюта тушумининг фақат 25% банкларга мажбурий равишда сотишлари зарур

Тошкент. 21 сентябр. ЎзТАГ – Ўзбек экспортчилари эндиликда валюта тушумининг фақат 25% банкларга мажбурий равишда сотишлари зарур, олдин ушбу миқдор 50% ташкил қилар эди, деб хабар беради Ўзбек телеграф агентлиги (ЎзТАГ).

Ҳукуматнинг бунга доир қарори “Ўзбекистон” телеканалининг “Ахборот”  дастурида эълон қилинди.

Ушбу меъёр 20 сентябрдан кучга кирди.

“Ташкилий-ҳуқуқий шакли ва идоравий мансублигидан катъи назар, экспорт қилувчи корхона ва ташкилотлар, шу жумладан, микрофирмалар, кичик корхоналар, фермер ва деҳқон хўжаликлари янги мева-сабзавот, узум ва полиз маҳсулотларини экспорт қилишдан тушадиган валюта тушумининг 25%ини белгиланган тартибда мажбурий сотишни амалга оширади”, - дейилади хабарда.

Айни пайтда, олдин бўлгани каби, юқоридаги тилга олинган маҳсулотларини сотиш ва экспортга чиқариш билан “Ўзагроэкспорт” ихтисослаштирилган ташки савдо компанияси шуғулланади.

Эслатиб ўтамизки, “Ўзагроэкспорт”  2016 йил апрелда ташкил этилган бўлиб, “Ўзбекозиқовқатхолдинг” холдинг компанияси таркибига киради.