Ўзбек футбол анчадан бери кенг кўламли ислоҳотларга муҳтож эди – ЎФФ президенти

Тошкент. 25 январ. ЎзТАГ – Ўзбек футбол анчадан бери кенг кўламли ислоҳотларга муҳтож эди, деб ҳисоблайди Ўзбекистон футбол федерациясининг (ЎФФ) президенти  Умид Аҳмаджонов, деб хабар беради Ўзбек телеграф агентлиги (ЎзТАГ).

ЎФФ раҳбари бу ҳақида “Халқ сўзи” газетасига берган интервьюсида маълум қилди.

“Биз Миллий чемпионатимиз форматини бутунлай  ўзгартириб, энг аввало, Супер Лига ва Про Лига мусобақаларига асос солдик. Бундан бошқача йўл тута олмасдик, боиси ўзбек футболи аллақачон ислоҳотларга муҳтож эди. Сўнгги бир неча йил давомида миллий чемпионат ўйинлари, ҳаттоки энг кескин ва муросасиз руҳда кечадиган дерби ўйинларига ҳам мухлисларнинг ташрифи кескин камайиб кетгани хақида кўп гапирилди, аммо айтингчи, ишқибозларни яна стадионларга қайтариш борасида қандай амалий ишлар қилинди? Ҳеч қандай!”, - деб таъкидлади ЎФФ президенти.

Унинг сўзларига кўра, чемпионат форматини ўзгартириб биз биринчи навбатда жамоалар орасида кучли рақобат юзага келтиришни, ҳар бир ўйин финалга тенг баҳсга айланишини мақсад қилгандик. “Агар биз рақобат муҳитини яратсак, ҳар бир очко олтинга тенг бўлади. Бундай чемпионатда эса ўз ўзидан футболдаги нохуш иллат – келишилган ўйинлар барҳам топади”, - деб таъкидлади Аҳмаджонов.  

Шунингдек, жорий йилдан бошлаб  мавсум старт олишидан аввал футболчилар жисмоний тайёргарлик бўйича тест нормативларини топшириш амалиёти жорий қилинди. Шунда атига бор йўғи 12% спортчилар нормативларни топшира олишди.

Аҳмаджоновнинг сўзларига кўра, тез орада республикада фаолият кўрсатиб келаётган барча Олимпия захиралари коллежлари алоҳида назоратга олинади. Аслида Олимпия захиралари коллежлари терма жамоалар базаси сифатида ишлаши керак.  

“Шундай экан, ушбу масканларга кириш имтиҳонларидан тортиб, унинг самарали фаолият кўрсатиши, терма жамоаларимизга муносиб номзодлар етказиб бериши бизнинг жиддий назоратимизда бўлади”, - дея қайд этди ЎФФ раҳбари.

“Афсуски, сўнгги йилларга келиб юртимизда футбол тизими бутунлай издан чиқиб кетган. Мураббий ва ҳакамларни қўя турайлик, юртимизда “футбол атрофидаги шахслар” пайдо бўлган. Гарчанд соҳага ҳеч қандай алоқаси бўлмаса-да, масъул раҳбарларнинг эътиборсизлигидан фойдаланиб воситачилик билан шуғулланган. Улар асосан жамоалар ўртасида келишилган ўйинларни ташкил этишда, керакли натижага эришиш учун ҳакамлар билан келишишда, футболчиларнинг бошқа клубга трансфер қилинишида, ёш футболчиларнинг ёшини сунъий равишда кичрайтиришда  “жонбозлик” кўрсатишган. Айнан шундай иллатлар туфайли юртимизда футбол тизими йиллар давомида изидан чиқиб кетган”, - деб якунлади сўзларини У. Аҳмаджонов. 

Сурат манбаи: https://www.gazeta.uz/ru/2017/11/07/football/