Ўзбек “Ипотека-банк”и концентратлар, пюре, паста ва маринадлар ишлаб чиқарувчи корхонанинг бошланғич баҳосини $3,27 млн миқдорда белгилади

Тошкент. 17 июн. ЎзТАГ – “Ипотека-банк” акционерлик тижорат банки салоҳиятли инвесторларни “Valley Mountain’s Fresh” АЖни сотиш бўйича очиқ аукцион савдоларига таклиф қилди. Сотувга қўйилган мулкнинг бошланғич баҳоси 7,557 млрд сўм ($3,27 млн) деб белгиланган, дея хабар беради Ўзбек телеграф агентлиги (ЎзТАГ).
Банк хабарида айтилишича, савдоларда иштирок этишни истаган инвесторлар корхона бошланғич қийматининг 0,5%миқдорида гаров пули қўйишлари лозим. Айни пайтда гаров пули ҳам тендер ғолиби билан шартнома тузиш чоғида ҳисобга олинади.
Аукцион тугаллангандан кейин ғолиб корхона сотиб олиш қийматининг 15% тўлаши, қолганини эса олди-сотди шартномасида келишилган муддатда тўлаши лозим. Аукцион савдолари 2014 йилнинг 30 июнида бўлиб ўтади.
Эслатиб ўтамизки, “Valley Mountain’s Fresh” МЧЖ Фарғона вилоятининг Уч-Кўприк туманида жойлашган ва мева ва сабзовотлардан шиша идишларда концентрат, пюре, томат пастаси, тузланган маринадлар ишлаб чиқариш билан шуғулланади.