Ўзбек хоккейчилари Қозоғистонда хоккей бўйича очиқ турнирида “олтин” медални қўлга киритдилар
Тошкент. 21 октябр. ЎзТАГ – Пойтахтнинг “Бинокор” хоккей клуби куни кеча Алматида якун топган ҳаваскор хоккейчилар очиқ турнирининг ғолиби бўлди, деб хабар беради Ўзбек телеграф агентлиги (ЎзТАГ).
“Турнирдаги ягона Ўзбекистон жамоаси бўлган “Бинокор” жамоаси Тошкентдаги Ice Rink муз майдонидаги хоккей секцияси аъзоларидан ташкил топган. “Бинокор” қозоғистонлик "Капчагай", "Енбек" ва "Скиф" жамоаларини 9:0, 4:2 ва 4:1 ҳисобда осонлик билан енгди. Энг охирги ўйинда эса, ўзбекистонлик хоккейчилар турнирнинг энг сара ўйинчиларидан ташкил топган рамзий терма жамоаси устидан 6:4 ҳисобда ғалаба қозонди” – деб таъкидланади Маданият ва спорт ишлари вазирлиги хабарида.
Қизиғи шуки, “Бинокор” турнирнинг энг ёши катта жамоаларидан бири бўлди: жамоа ўйинчиларининг ўртача ёши 45да.
Таъкидланишича, ушбу ғалаба муз майдонидаги ҳоккей тўгарагига қатнаётган болалар учун яхши рағбат бўлди. 28 октябр куни “Бинокор” хоккей клуби Чимкентга йўл олиб, бу ерда Қозоғистонда хоккей мавсуми бошланишига бағишланган мусобақада иштирок этади.
