Ўзбек комбинати гелиоқурилмалари самарадорлигини синовдан ўтказмоқда

Тошкент. 15 август. ЎзТАГ – Олмалиқ тоғ-металлургия комбинатнининг (ОТМК) бўлинмаларидан бирида гелиоқурилмалардан фойдаланиш бошланди. Ускуналар синовдан ўтказилгандан кейин янги қурилмалар шу йилнинг июнидан бошлаб ишга туширилди, дея хабар қилади Ўзбек телеграф агентлиги (ЎзТАГ).

ОТМКдан хабар қилишларича, жорий йилда комбинат бир неча гелиоқурилмалар сотиб олди, улардан учтаси ҳозирда корхонанинг трактор парки ва икки автобазасида ишлатилмоқда.

Май ойида Германиядан олинган уч гелиоқурилма комбинатнинг ўз кучи билан ўрнатилди. 16 июндан бошлаб улар тўлиқ ишламоқда. Қурилмалар ёрдамида трактор паркининг ювиниш хонаси ва ошхонасида фойдаланиладиган 2 кубометр сув иситилади. Ўтган бир ярим ой давомида гелиоқурилмалар ёрдамида 1,2 минг кубометр табиий газ тежаб қолинди.

Бир гелиоқурилма 10та қуёш батареяси – катталиги 2,3х1,1 метрга тенг бўлган гелиоколлекторлардан ташкил топган. Гелиоколлектор қурилманинг асосий қисмидир. У қуёш нурларини иссиқлик энергиясига айлантириб беради. Қурилмалардан асосан йилнинг иссиқ даври – мартдан ноябрга қадар фойдаланилади.

Ҳар бир қуёш батареясида иссиқлик ўлчаш датчиги ўрнатилган. Яна бир датчик қозонхонада жойлашган. Бу ердаги барча жараёнлар компьютерлаштирилган бўлиб, бу ишни анча енгиллаштиради. Гелиоқурилмаларнинг ишлаш муддати 50 йилга тенг.