Ўзбек олимлари пахта териш агрегатининг янги моделини яратдилар
Тошкент. 17 апрел. ЎзТАГ – Ўзбек олимлари пахта териш агрегатининг янги моделини яратдилар, дея хабар беради Ўзбек телеграф агентлиги (ЎзТАГ).
“Ўзбекистон қишлоқ хўжалигини механизатциялаш ва электрлаштириш илмий-тадқиқот институти олимлари томонидан янги пахта териш агрегатининг модели ихтиро қилинди. Мазкур модел қишлоқ хўжалиги машинасозлиги соҳасида фойдаланиш учун мўлжалланган. Унинг вазифаси пахта териш агрегатининг унумдорлигини ва пахтани тўлиқ теришини оширишдан иборатдир”, - дейилади Ўзбекистон Интеллектуал мулк агентлиги хабарида.
Хабарда таъкидланишича, янги пахта териш агрегати таркибига чопиқ трактори кўринишидаги энерговосита, шпинделли териш аппаратини ўз ичига олган териш ускунаси ва сачратадиган форсункаларга эга қувур киради.
Бундан ташқари, янги моделда тракторга ўрнатилган сиқилган ҳаво генератори бўлиб, у намлайдиган суюқлик учун мўлжалланган зич беркитилган идиш билан уланган. Бу ердаги герметик идиш сақловчи ҳаво клапани билан таъминланган ва сачратадиган
форсункаларга эга қувур билан ўзаро боғланган. Ўз навбатида, сачратадиган форсункалар эса суюқликни шпинделларнинг бутун бўйи бўйлаб сачратиш имконияти мавжуд.
