Ўзбек олимлари ушоқ молларда учрайдиган касалликка қарши вакцина яратдилар
Тошкент. 20 август. ЎзТАГ – Ўзбек олимлари Игорь Ряснянский, Бахтиёр Мирзаев, Актам Ғафуров ва Баходир Аҳмедовлар ушоқ молларда учрайдиган касалликка қарши вакцина яратдилар, дея хабар қилади Ўзбек телеграф агентлиги (ЎзТАГ).
Бу ҳақидаги маълумот Ўзбекистон Республикаси Интеллектуал мулк агентлиги сайтида жойлаштирилган.
Майда шохли молларда колибактериоз, салмонеллёз ва пастереллёз касалликларини олдини олиш учун инактивланган радиобиологик вакцина ва уни олиш усули яратилди. Натижада, майда шохли молларда юқоридаги касалликларнинг олдини олишга, бир марталик вакцинасия қилиш учун жадаллаштирилган электронлар билан инактивланган радиобиологик вакцинани олишга ва уни ишлаб чиқаришни ҳавфсизлантиришга эришилди.
Колибактериоз, салмонеллёз ва пастереллёз – ушоқ молларда (қўй-эчки) кечадиган ўткир юқумли касаллик. Ушбу касалликнинг иқтисодий зарари анчагина ва шу боис дунё чорвачилигида ушбу касаллик профилактикасига катта маблағ сарфланади.
