Ўзбек паспорти дунёнинг энг кучли паспортлари рейтингида 64-ўринни олди

Тошкент. 29 январ. ЎзТАГ – Ўзбек паспорти дунёнинг энг кучли паспортлари рейтингида 64-ўринни олди, деб хабар беради Ўзбек телеграф агентлиги (ЎзТАГ).

Ушбу маълумотлар жаҳондаги энг нуфузли пастпортлар рейтингини тузиб чиққан Passport Index ташкилоти сайтида келтирилган. Рейтингга хужжат эгаси визасиз ташриф буюриши мумкин бўлган мамлакатлар сони асос қилиб олинган.

Хусусан, Ўзбекистон фуқаролари визасиз дунёнинг 53 мамлакатига ташриф буюришлари мумкин.

МДҲ мамлакатлари орасида Россия рейтингда 36-ўринни, Қозоғистон 53-, Қирғизистон 63-, Туркманистон 70-ўринни эгаллади.

Рейтингнинг биринчи поғонасини анъанавий равишда АҚШ ва Буюк Британия, кейинги поғоналарни Франция, Жанубий Корея ва Германия эгаллади.

Рейтинг дунёнинг жами 199 мамлакатини қамраб олган.