Ўзбек сенаторлари Хива шаҳрини вилоят бошқарувидаги шаҳарлар тоифасига киритиш масаласини кўриб чиқадилар
Тошкент. 23 май. ЎзТАГ – Ўзбек сенаторлари Хоразм вилоятининг Хива шаҳри ва Хива туманининг чегараларини ўзгартириш, Хива шаҳрини вилоят бўйсунувидаги шаҳарлар туркумига киритиш тўғрисидаги, Шаҳрисабз шаҳрини вилоят бўйсунувидаги шаҳарлар туркумига киритиш тўғрисидаги, шунингдек Жиззах вилоятининг Зомин ва Зарбдор туманлари чегараларини ўзгартириш тўғрисидаги масалаларни кўриб чиқадилар, деб хабар беради Ўзбек телеграф агентлиги (ЎзТАГ).
2017 йилнинг 22 май куни Ўзбекистон Республикаси Олий Мажлиси Сенати Кенгашининг мажлиси бўлиб ўтди. Мажлисни Олий Мажлис Сенати Раиси Н. Йўлдошев олиб борди. Кенгаш Ўзбекистон Республикаси Олий Мажлиси Сенатининг ўнинчи ялпи мажлисини шу йилнинг 27 май куни Тошкент шаҳрида чақириш тўғрисида қарор қабул қилди.
“Сенатнинг ялпи мажлиси кун тартибига мамлакатимизда олиб борилаётган ислоҳотларнинг самарадорлигини тубдан оширишга, 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Халқ билан мулоқот ва инсон манфаатлари йили”да амалга оширишга оид Давлат дастури ижросига қаратилган Ўзбекистон Республикасининг бир қатор қонунлари киритилмоқда”, - дейилади Олий Мажлиси Сенати Ахборот хизматининг хабарида.
Улар орасида “Ўзбекистон Республикаси Конституциясининг айрим моддаларига ўзгартишлар киритиш тўғрисида (80, 93, 108 ва 109-моддаларига)”ги, “Ўзбекистон Республикасининг Конституциявий суди тўғрисида”ги, “Суд ва Ўзбекистон Республикаси Олий суди ҳузуридаги Суд қонунчилигини демократлаштириш ва либераллаштириш ҳамда суд тизими мустақиллигини таъминлаш бўйича тадқиқот маркази ходимларининг мансаб даражалари тўғрисидаги низомга ўзгартиш ва қўшимчалар киритиш ҳақида”ги, “Ўзбекистон Республикасининг айрим қонун ҳужжатларига ўзгартиш ва қўшимчалар киритиш, шунингдек айрим қонун ҳужжатларини ўз кучини йўқотган деб топиш тўғрисида”ги қонунлар бор.
Шундан кейин таъкидланишича, ялпи мажлисда сенаторлар бир қатор халқаро шартномалар ва конвенцияларни ратификация қилиш тўғрисидаги қонунларни, жумладан, “Ўзбекистон Республикаси билан Туркманистон ўртасидаги стратегик шериклик тўғрисидаги Шартномани (Ашхобод, 2017 йил 6 март) ратификация қилиш ҳақида”ги Ўзбекистон Республикаси Қонунини ҳам кўриб чиқадилар.
Шу билан бирга, сенаторлар Ўзбекистон Республикаси ташқи ишлар вазирининг ташқи иқтисодий алоқаларни ривожлантириш, чет эл инвестицияларини жалб қилиш бўйича Ўзбекистон Республикаси Ташқи ишлар вазирлиги томонидан амалга оширилган ишлар, шунингдек бу соҳадаги истиқболлар тўғрисидаги ҳисоботини ҳам тинглайдилар.
Ялпи мажлисда Ўзбекистон Республикаси Олий Мажлиси Сенатининг ваколатига кирадиган бошқа масалалар ҳам муҳокама қилиниши режалаштирилмоқда. Бандан ташқари, ўнинчи ялпи мажлисга тайёргарлик кўриш ва уни ўтказиш юзасидан Олий Мажлис Сенати қўмиталари ва Девони фаолиятини мувофиқлаштириш мақсадида Кенгаш томонидан ишчи гуруҳ тузилди.
