Ўзбек суғуртачиларининг низом капитали 15% ўсди

Тошкент. 30 август. ЎзТАГ – 2016 йилнинг биринчи яррим йили якунлари бўйича Ўзбекистон суғуртачиларининг ялпи низом капитали 433,4 млрд сўмни ташкил қилди, бу эса ўтган йилгидан 15% кўпдир, деб хабар беради Ўзбек телеграф агентлиги (ЎзТАГ).

Хабар берилишича, бунинг 249 млрд сўми миллий валютада, қолган қисми конвертация қилинадиган валютада бўлиб, $62,6 млнга тенг.

Saipro рейтинг агентлиги маълумотларига кўра, мамлакат суғурта компанияларининг инвестициялари миқдори 804,6 млрд сўмни ташкил қилган (+20% ёки 131,3 млрд сўм).

Ҳисобот даврида деярли барча йўналишларда ўсиш кузатилган. Масалан, кредит муассасаларида депозитларга (омонатларга) инвестициялар 380,8 млрд сўмга етган (+19%), қимматли қоғозларга инвестициялар – 324,3 млрд сўмга (+21%), кўчмас мулкка инвестициялар – 38,7 млрд сўмга етган (+47%).

Бундан ташқари, берилган кредитлар ҳажмининг – 8,4 млрд сўм, – ҳам бир оз ўсиши кузатилмоқда (+9%).