Ўзбек теннисчиси Япониядаги турнирда ғолибликни қўлга киритди

Тошкент. 31 май. ЎзТАГ – Ўзбекистоннинг биринчи ракеткаси Нигина Абдураимова Каруидзаведа (Япония) бўлиб ўтган ITF турнирида ҳал қилувчи баҳсда икки сетда бельгиялик Ан-Софи Месташни 6:3, 7:5 ҳисобида енгиб ғолибликни қўлга киритди, деб хабар беради Ўзбек телеграф агентлиги (ЎзТАГ).

Ўзбекистон Теннис федерациясидан хабар беришларича, учрашув 1 соат 46 дақиқа давом этган. Бу вақт давомида жаҳоннинг 192-ракеткаси бўлган 21 ёшли Нигина бешта эйс ва учта брейк натижасига эришди ҳамда тўп узатишда тўрт марта адашди.

Ўз навбатида, дунё рейтингида 174-ўринда бўлган 22 ёшли Ан-Софи уч тўпни майдондан ташқарига чиқариб юборди, битта брейк-пойнт амалга ошириб, бешта иккилик хатога йўл қўйди.

Н.Абдураимова учун ушбу мусобақалардаги соврин мавсумдаги илк соврин бўлиб, унга 50 рейтинг очко олиб келди.