Ўзбек товарларини кўргазмаларга олиб чиқишни соддалаштириш режалаштирилмоқда
Тошкент. 15 декабр. ЎзТАГ – Қонун ҳужжатларини баҳолаш тизими порталида Вазирлар Маҳкамасининг “Хорижда кўргазма тадбирларини ўтказиш учун мўлжалланган товарларни олиб чиқиб кетиш тартибини соддалаштиришга доир чора-тадбирлар тўғрисида”ги қарори лойиҳаси муҳокама қилинмоқда, деб хабар беради Ўзбек телеграф агентлиги (ЎзТАГ).
Тадбиркорлик субъектларига хорижда кўргазма ва ярмаркаларда иштирок этиш учун мўлжалланган эквивалентда суммаси $5 минггача бўлган товарларни экспорт шартномасини тузмасдан ва божхона юк декларациясини расмийлаштирмасдан олиб чиқиб кетишга рухсат бериш таклиф қилинмоқда. Товарга илова қилинадиган ҳужжатлар олиб чиқиб кетиш учун асос бўлади.
Мамлакат Президентининг 2017 йил 3 ноябрдаги “Ташқи савдо фаолиятини янада эркинлаштириш ва тадбиркорлик субъектларини қўллаб-қувватлаш чора-тадбирлари тўғрисида”ги қарорига иловада кўрсатилган товарлар бундан мустасно.
Бу ҳолда тадбиркорлик субъектлари Ўзбекистон божхона органларига ёзма равишда хорижга ўтказиладиган кўргазма ва ярмаркаларнинг санаси, вақти ва жойи, олиб чиқиб кетиладиган товарларнинг номи, миқдори ва қиймати ҳақидаги маълумотларни тақдим этади.
Тадбиркорлик субъектлари олиб чиқиб кетилган товарларни реализация қилишдан олинган маблағларни Ўзбекистон тижорат банкларидаги ўз ҳисобварақларига, шу жумладан, банк ўтказмаси, хорижий валютадаги нақд шаклларида топширишлари мумкин.
Сурат манбаи: фото из открытых источников
