Ўзбек туроператорлари мамлакатга россиялик туристларни жалб қилмоқдалар

Тошкент. 15 декабр. ЎзТАГ – Ўзбек туроператорлари мамлакатга россиялик туристларни жалб қилмоқдалар, деб хабар беради Ўзбек телеграф агентлиги (ЎзТАГ).

“Ўзбекистонга хорижий сайёҳлар оқимини кўпайтириш ва ўзбек туристик компанияларига хориж туроператорлари билан алоқалар ўрнатишга кўмаклашиш мақсадида “Ўзбектуризм” МК Россия Федерацияси Туризм бўйича федерал агентлик билан ҳамкорликда 14 декабрда Москвада россиялик сайёҳлик ширкатлари вакиллари билан форум уюштирди”, - дейилади “Ўзбектуризм” компанияси хабарида.

Ўзбек делегацияси таркибига “Orient Voyages”, “Samarkand Renaissance”, “Tes tour”, “Marco Polo Central Asia Travel”, “Sogda Tour”, “Trip group”, “Compas tour”, “Sheherezade Voyages”, “Asia Tour Elitе” ва “Dolores Travel” туркомпания вакиллари кирди.

Форум доирасида Ўзбекистон туристик агентликлари янги туристик йўналишларни тақдим этиб “B2B” шаклида учрашувлар ўтказдилар.

Тадбир доирасида Ўзбекистонга 3 кунлик бепул саёҳат учун 2 сертификат ўйналди.