Ўзбек ва белорус авиалиниялари код-шеринг шартномаси туздилар

Тошкент. 29 сентябр. ЎзТАГ – “Ўзбекистон ҳаво йўллари” авиакомпанияси ва “Белавиа” авиаширкати  авиалиниялардан биргаликда фойдаланиш (код-шеринг) ҳақида шартнома имзоладилар, деб хабар беради Ўзбек телеграф агентлиги (ЎзТАГ) МАК матбуот хизматига асосланган ҳолда. 

“Ҳамкорликнинг ушбу босқичи ҳар икки авиакомпания йўловчилари учун арзон нархларда сафар қилиш бўйича қўшимча имкониятлар яратади, шунингдек, Минск орқали  Европа ва МДҲ пунктларига, Тошкент орқали Марказий ва Шарқий Осиё аэропортларига ўтиш учун қулай шароитлар туғдиради”, - дейилади хабарда.

Маълумот ўрнида, ҳозирда “Ўзбекистон ҳаво йўллари” авиакомпанияси ва “Белавиа” авиаширкати ўртасида интерлайн-келишув (ўз бланкларида ҳамкор авиакомпания маршрутлари учун чипта расмийлаштириш ҳуқуқи) ва махсус келишув мавжуд, шунингдек, электрон интерлайн (электрон чиптани тан олиш) тартиби ҳам жорий этилган.

“Белавиа” авиакомпанияси билан код-шер Тошкент-Минск-Тошкент йўналишида 15 сентябрдан бери амал қилади.