Ўзбекистан янгиланган ФИФА рейтингида етти поғона пастлади

Тошкент. 19 сентябр. ЎзТАГ – Халқаро футбол федерацияси (ФИФА) жаҳон термаларининг янги рейтингини эълон қилди, дея хабар беради Ўзбек телеграф агентлиги (ЎзТАГ).

“Янги рейтингга кўра, Ўзбекистон миллий терма жамоаси аввалги ойда эгаллаган рейтингидан 7 поғона пастлаган ҳолда жаҳон рейтингида 58-ўринда бормоқда. Айни пайтда Ўзбекистон миллий терма жамоаси Осиё миқёсида ҳамон учинчи ўринда бормоқда. Осиё Қитъаси рейтингида Эрон (44) Японияни (48) ортда қолдириб, биринчи ўринга чиқди. Қайд этиш лозимки, Эрон аввалги ойдаги ўрнидан 4 ўрин кўтарилиб Осиёнинг биринчи рақамли жамоасига айланди. Ўзбекистондан кейинги икки ўринни эса Жанубий Корея (63) ва Иордания (69) терма жамолари банд этган”, - деб таъкидлашди мамлакат Футбол федерацияси матбуот хизматида.

Ўзбекистоннинг 2015 йилги Осиё кубогидаги рақиблари рейтингда қуйидаги ўринларни эгалладилар: Саудия Арабистони – 82-ўрин, Хитой – 97-ўрин ва КХДР – 150-ўрин.