Ўзбекистон адлия органлари маҳаллий ҳокимият органларининг қарорларини қаттиқроқ текшира бошладилар
Тошкент. 19 феврал. ЎзТАГ – Ўзбекистон адлия органлари маҳаллий ҳокимият органларининг қарорларини қаттиқроқ текшира бошладилар: агар 2012-2013 йилларда ҳокимларнинг 2224 та қарор лойиҳаси ҳуқуқий экспертизадан ўтказилган бўлса, 2014-2015 йилларда бу кўрсаткич 3785тани ташкил этди, хабар беради Ўзбек телеграф агентлиги (ЎзТАГ).
Булардан 2012-2013 йилларда халқ депутатлари вилоят, туман ва шаҳар Кенгашларининг 269 та қарор лойиҳалари ҳудудий адлия органлари томонидан ҳуқуқий экспертизадан ўтказилган бўлса, бу кўрсаткич 2014-2015 йилларда эса 611 тани ташкил этди.
Адлия вазирлигидан хабар қилишларича, бугунга қадар давлат ҳокимияти ва бошқаруви органлари тизимида коррупция, бошқа ҳуқуқбузарликлар содир этилиши учун шароит яратадиган, шунингдек тадбиркорлик субъектлари учун асоссиз харажатлар қилишга олиб келувчи ортиқча маъмурий ҳамда бошқа чекловларни жорий этадиган қоидалар ва нормалар бор-йўқлигини аниқлаш бўйича аниқ бир норматив-ҳуқуқий ҳужжат мавжуд эмас эди.
Эндиликда мазкур бўшлиқ тўлдирилди.
Адлия вазирлигининг 2015 йил 25 декабрдаги буйруғи билан “Норматив-ҳуқуқий ҳужжатлар лойиҳаларининг коррупцияга қарши экспертизасини ўтказиш услубиёти” тасдиқланди.
Мазкур услубиёт маҳаллий давлат ҳокимияти органларининг қарорлари лойиҳаларининг, шунингдек вазирликлар, давлат қўмиталари ва идораларнинг норматив-ҳуқуқий ҳужжатларининг коррупцияга қарши экспертизасини ўтказишнинг тартибини белгилаб беради.
