Ўзбекистон АЭС халқаро стандартлар бўйича қуришга ваъда берди

Дата: 14:42, 19-09-2018.

Тошкент. 19 сентябр. ЎзТАГ – Ўзбекистон атом электростанциясини (АЭС) халқаро стандартлар бўйича қуришга ваъда берди, деб хабар беради Ўзбек телеграф агентлиги (ЎзТАГ).

Бу ҳақида 2018 йилнинг 17-21 сентябрида Венада (Австрия) бўлиб ўтаётган Халқаро атом энергияси агентлиги (МАГАТЭ) бош конференциясининг 62-йиллик сессиясида гапирилди. Унда Фанлар академияси президенти Беҳзод Йўлдошев бошчилигидаги Ўзбекистон делегацияси ҳам иштирок этмоқда.

Ташқи ишлар вазирлигидан хабар беришларича, ялпи мажлиснинг биринчи кунида Б. Йўлдошев миллий маъруза билан қатнашди. Унинг чиқишида МАГАТЭ билан ҳамкорликнинг, шу жумладан, техник кўмак соҳасида ҳамкорликнинг муҳимлиги қайд этилди.

“МАГАТЭ билан ҳамкорлик ўрнатилганидан буён ўтган 25 йил давомида Ўзбекистон мамлакат ва минтақанинг ядро хавфсизлигини ошириш бўйича улкан ишларни амалга оширди, мамлакатимиз ташаббуси билан Марказий Осиёда ядро қуролидан ҳоли ҳудуд тўғрисидаги шартнома имзоланди”, - дейилади хабарда.

Шунингдек, ўзбек томони ўз чиқишида конференция қатнашчиларини 2018 йилнинг 7 сентябр куни Москвада Ўзбекистон ва Россия ўртасида республика ҳудудида атом электр станциясини қуриш бўйича ҳамкорлик тўғрисида ҳукуматлараро битим имзолангани, бу йўналишда, тинч мақсадларда атом энергиясини ривожлантириш ва тармоқ учун кадрлар тайёрлаш бўйича ишлар бошлангани ҳақида хабардор қилди.

Б.Йўлдошев лойиҳани амалга оширишда МАГАТЭ тавсиялари ва ушбу соҳадаги халқаро меъёр ва қоидаларга қатъий риоя қилиниши таъминланишини баён қилди, шунингдек, ушбу йўналишда МАГАТЭнинг ҳар томонлама кўмагига умид билдирди.

Қайд этилишича, Ўзбекистоннинг Австриядаги элчихонасининг хабар қилишича, МАГАТЭ бош конференциясининг 62-йиллик сессиясида иштироки доирасида Ўзбекистон делегацияси МАГАТЭ раҳбарияти ва бошқа давлатлар ҳамда компаниялар вакиллари билан атом энергиясидан тинч мақсадларда фойдаланиш соҳасида ҳамкорлик қилиш масалалари бўйича музокаралар ўтказишни режалаштирган.

Эслатиб ўтамизки, имзолаган ҳукуматлараро келишувга мувофиқ, Ўзбекистонда биринчи атом электр станциясини қуриш кўзда тутилмоқда. У россия технологиялари бўйича “3+” авлодидаги ВВЭР-1200 сув-сув реакторли ҳар бирининг қуввати 2,4 ГВтлик 2 та энергоблокдан иборат бўлади. Ҳозирда АЭСни қуриш учун жой танлаш ишлари бошланган. Лойиҳа “Росатом” давлат корпорацияси билан биргаликда амалга оширилади.

 

Сурат манбаи: https://www.rosatom.ru

Янгилик билан ўртоқлашиш: