Ўзбекистон Амударё ва Сирдарёдан фойдаланиш тўғрисидаги конвенцияларни келишишни жадаллаштиришни таклиф қилмоқда

Тошкент. 8 июн. ЎзТАГ – Ўзбекистон БМТ томонидан таклиф этилган Амударё ва Сирдарёдан фойдаланиш тўғрисидаги конвенцияларни минтақанинг барча давлатлари манфаатларини ҳисобга олган ҳолда биргаликда ишлаб чиқиш ва келишишни жадаллаштиришни таклиф қилмоқда, деб хабар беради Ўзбек телеграф агентлиги (ЎзТАГ).

Бу ҳақида Ўзбекистон Бош вазири ўринбосари Нодир Отажонов Тошкентда очилган 2018 йилги Марказий Осиё халқаро экология форумиги нутқида айтиб ўтди.

“Марказий Осиё ҳар доим сув ресурсларига боғлик бўлиб келган. Ҳозирда, глобал исиш, сув истеъмолининг ошиши шароитида ушбу муаммо фақат чуқурлашиб бормоқда. Бугунги кунда Марказий Осиёдаги қишлоқ хўжалиги ерларининг 90%дан зиёди сунъий суғоришни талаб этмоқда. Энг оддий ҳисоб-китобларга кўра, минтақа аҳолисининг қарийб 80%ининг – аграр соҳада банд бўлган 55 млндан зиёдининг ҳаёт-мамоти сувдан фойдаланишга тўғридан-тўғри боғлиқ”, - деди у.

“Жаҳон банки прогнозларига кўра, 2050 йилга келиб минтақада аҳоли сони 90 млн кишигача етиши билан характерланадиган демографик ўсиш фонида сув танқислиги 25-30%ни ташкил этади. Боз устига, суғорма ерларда фойдаланиладиган сув ресурсларига бўлган эҳтиёж 2020 йилга келиб 30%га ортади. БМТ экспертлари ҳисоб-китобига кўра, Марказий Осиёда сувдан оқилона фойдаланишдан олинадиган иқтисодий фойда минтақавий ички ялпи маҳсулотнинг 5% ёки тахминан $20 млрдни ташкил этиши мумкин”, - деб таъкидлади бош вазири ўринбосари.

Шунингдек, Нодир Отажонов “минтақа раҳбарларининг саъй-ҳаракатлари билан Марказий Осиёда бутунлай янги минтақавий ҳамкорлик сиёсий муҳитининг шаклланиши бошланганлиги”ни таъкидлаб ўтди.

“Бугун барчамиз кундан кун трансчегаравий характер касб этиб, Марказий Осиёдаги барча мамлакатлар манфаатларига таъсир қилувчи экологик таҳдидларга тенг даражада дуч келмоқдамиз. Атроф муҳитнинг ифлосланиши, иқлим ўзгариши, сув ресурсларининг тақчиллиги, чўллашиш жараёнларининг фаоллашиши, қурғоқчиликнинг тез-тез содир бўлиши минтақамизнинг барқарор ривожланишини хавф остига қўймоқда. Ҳаракатлар, билимлар, ресурсларимизни бирлаштирмасдан бу муаммоларга муносиб жавоб қайтара олмаймиз”, - деб таъкидлади у.

Сурат манбаи: https://www.uzdaily.uz/articles-id-33818.htm