Ўзбекистон банклари “Соғлом бола йили” режаларини эълон қилдилар

Тошкент. 13 март. ЎзТАГ – Ўзбекистон банк тизими “Соғлом бола йили” давлат дастури ва давлат ёшлар сиёсатини амалга ошириш доирасида 7,5 трлн. сўм сарфлашни режалаштирмоқда, дея хабар беради Ўзбек телеграф агентлиги (ЎзТАГ).
Ушбу маълумотлар бугун Ўзбекистон Республикаси Марказий банки томонидан ўтказилган матбуот анжуманида эълон қилинди.
Юқоридаги маблағлар кичик бизнес ва хусусий тадбиркорлик субъектлари, айниқса, оилавий тадбиркорликни, ўқув юртлари битирувчиларини тадбиркорликка жалб этишни молиявий қўллаб-қувватлашга мўлжалланган. Ўқув юртлари битирувчиларини бизнесга жалб этишга 160 млрд сўм кредитлар бериш режалаштирилган.
Аёл-тадбиркорларнинг бизнес лойиҳаларини қўллаб-қувватлашга 700 млрд сўм миқдордаги кредитлар ажратиш режалаштирилган. Бундан ташқари, ишчиларининг камида 50% аёллар бўлган кичик бизнес субъектларига ҳам имтиёзли кредитлар ажратиш кўзда тутилмоқда.
Ёш оилаларга ипотека кредитлари ҳажмини ошириш учун 204 йилда 215 млрд сўм имтиёзли кредитлар ажратилади. Бундан ташқари, қишлоқ жойларида 11 минг намунали уйлар қуришга 1 трлн. сўм сарфланади.
Яна 1 трлн сўм маҳаллий инфраструтурани ривожлантиришга ажратилиши режалаштирилган.