Ўзбекистон банкларида замонавий корпоратив бошқарув жорий этилади

Тошкент. 5 март. ЎзТАГ – Давлат активларини бошқариш бўйича яқинда ташкил этилган агентликда давлат банкларида бозор ислоҳотларини амалга ошириш, жумладан, корпоратив бошқарувнинг замонавий усулларини жорий этиш масалалари муҳокама қилинди, дея хабар беради Ўзбек телеграф агентлиги (ЎзТАГ).

Агентлик хабар беришига кўра, Ўзбекистонда давлат активларини бошқариш тизимини тубдан ислоҳ қилиш жараёни бошланди. Мазкур масала бўйича 14 январда президентнинг ПФ-5630-сонли Фармони ва П-4112-сонли Қарор қабул қилинди.

Хусусан, агентликка илгари Ўзбекистон Республикаси Молия вазирлигининг тасарруфида бўлган банк сектори, тижорат банкларининг устав капиталидаги давлат акциялар пакетини ва суғурта компаниялари фаолиятини ислоҳ қилиш учун топширилди.

Бугунги кунда Ўзбекистоннинг 29 банкидан 13 тижорат банкининг устав капитали таркибида давлат акция пакетлари мавжуд. Уларни бошқариш учун агентлик таркибида Молиявий активларни бошқариш Департаменти ташкил этилган.

Агентлик халқаро ташкилотлар, консалтинг компанияларининг тавсияларини, шунингдек, Ўзбекистон банк-молия соҳасидаги маҳаллий компанияларнинг муваффақиятли тажрибаларини фаол равишда амалга татбиқ этишни режалаштирмоқда.

Давлатлар иштирокидаги корхоналарда бозор иқтисодиёти тенденцияларга мослашувчанлик ва ўзгаришларни қабул салоҳияти мавжуд эмаслиги, уларнинг инвестицияларни жалб этиши қобилияти пасайиб кетишига сабаб бўлган солиқ ва божхона имтиёзларига ортиқча боғланиб қолганлиги, индивидуал характерга эга эканлиги, стратегик режалар тизими, таҳлилнинг йўқлиги ҳамда тавакаллал йўл билан бошқариш ислоҳотлар ўтказиш заруратини келтириб чиқарди.

Агентлик давлат корхоналарини бошқариш учун бозор механизмларини ишлаб чиқиш, улардаги замонавий корпоратив бошқарув усулларини жорий этиш, давлат корхоналарининг устав капиталидаги улушини аста-секин қисқартириш ва халқаро ташкилотлар ва компаниялар иштирокидаги очиқ хусусийлаштиришни таъминлаш каби вазифаларни қўйган.

 

Сурат манбаи: intratool.com