Ўзбекистон банкларининг капитали 8 трлн сўмдан ошди

Тошкент. 18 апрел. ЎзТАГ – 1 апрел ҳолатига келиб Ўзбекистон банкларининг ялпи капитали 8 трлн сўмдан ошди, деб хабар беради Ўзбек телеграф агентлиги (ЎзТАГ).

Ушбу маълумотлар Марказий банк бошқарув ҳайъатининг 2016 йилнинг биринчи чорагида банк тизими фаолияти якунларини муҳокама қилишга бағишланган йиғилишда келтирилди. Йиғилишни Марказий банк раиси Файзулла Муллажонов олиб борди.

Банк активлари 2015 йилнинг 1 апрел ҳолатига нисбатан 25,4% ўсиб, бугунги кунда 69,7 трлн сўмга етгани таъкидланди.

Ҳисобот даврида иқтисодиётнинг реал секторига йўналтирилган кредитларнинг умумий ҳажми 2015 йилнинг 1 апрел ҳолатига нисбатан 1,2 бараварга кўпайиб, шу йилнинг 1 апрель ҳолатига кўра, 44,1 трлн сўмни (26,7%) ташкил этди.

Шунингдек, бугунги кунда ўзбекистон банк тизими капиталининг етарлилик даражаси 23,2% ташкил этиб, у халқаро банк назорати бўйича Базель қўмитаси томонидан белгиланган талабга (8%) нисбатан қарийб 3 баробар зиёдлиги таъкидланди.

Банк тизимининг жорий ликвидлик даражаси бир неча йилдан буён 64,5% юқори бўлиб, бу кўрсаткич ҳам жаҳон амалиётида умумқабул қилинган минимал кўрсаткичдан 2 баробардан ортиқдир.

Жумладан, микрокредитлар ҳажми 772,9 млрд сўмдан ошиб, бу кўрсаткич ҳам ўтган йилнинг шу даврига нисбатан 1,3 баробар ўсди, аёлларнинг тадбиркорлик фаолиятини қўллаб-қувватлашга йўналтирилган кредитлар миқдори 2015 йилнинг шу даврига нисбатан 1,3 баробар ошиб, 409,7 млрд сўмдан ошди, касб-ҳунар коллежлари битирувчиларига ажратилган кредитлар 63,4 млрд сўмга етди. 

Эслатиб ўтамизки, Ўзбекистонда 26 тижорат банки фаолият юритади.

$1=2888,39 сўм