Ўзбекистон чегарасида 1,12 млрд сўмлик заргарлик буюмлари контрабандаси тўхтатилди

Тошкент. 12 май. ЎзТАГ – 2014 йилнинг бошидан бери Ўзбекистон чегарасида заргарлик буюмларини ноқонуний олиб ўтиш билан боғлиқ 78 ҳолат аниқланди. Натижада қиймати 1,12 млрд сўмлик 24,4 кг олтин ва бошқа заргарлик буюмлари ушлаб қолинди, дея хабар беради Ўзбек телеграф агентлиги (ЎзТАГ).
“Истамбул-Тошкент» рейси бўйича парвозини якунлаган марғилонлик Э.Мариповнинг чангютгичидан 1,4 кг оғирликдаги кумушдан тайёрланган заргарлик буюмлари топилди. Айни шу рейсдан тушган фарғоналик Д.Сидикжонованинг ёнидан қиймати 2,5 млн. сўмдан зиёд бўлган 159 гр. оғирликдаги тилла ва кумуш тақинчоқлар чиқди. Иккала қоидабузар ҳам заргарлик буюмларини белгиланган меъёрдан ортиқча ва T-6 шаклидаги божхона баённомасида қайд этмасдан туриб олиб киришга уринишган”- деб таъкидлашди Давлат Божхона қўмитаси матбуот хизматида.
Шунингдек, божхоначилар Туркиядан қайтаётган йўловчилар наманганлик М.Шамсидинова томонидан қиймати 10 млн. сўмдан ортиқ 210 гр. тилла тақинчоқлар божхона баённомасида кўрсатилмай ва божхона ходимининг оғзаки сўроғи пайтида маълум қилинмай олиб ўтишга уринишганлигини фош қилишди.
Бундан ташқари, “Тошкент” аэропорти божхонаси ходимлари томонидан туркиядан учиб келган самарқандлик Ф.Тураева томонидан салкам 16 млн. сўмлик 237 гр. тилла тақинчоқлар ҳам ушлаб қолинди.