Ўзбекистон чет элда миллий ҳунармандчилик буюмлари дўконларини очади
Тошкент. 2 декабрь. ЎзТАГ – Ўзбекистон чет элда миллий ҳунармандчилик буюмлари дўконларини очади, деб хабар беради Ўзбек телеграф агентлиги (ЎзТАГ).
"(Президентининг "Ҳунармандчиликни янада ривожлантириш ва ҳунармандларни қўллаб-қувватлашга доир қўшимча чора-тадбирлар тўғрисида"ги – ЎзТАГ) қарорига мувофиқ республикамизнинг чет элдаги дипломатик ваколатхоналари ва бошқа йирик шаҳарларда савдо уйлари ва миллий ҳунармандчилик буюмлари дўконлари ташкил этилади", - дейилади Адлия вазирлиги матбуот хизмати хабарида.
Қайд этилганидек, республика ҳудудлари ҳунармандчиликнинг асосий йўналишлари бўйича ихтисослаштирилади ва уларга хорижий бозорларда ҳунармандчилик маҳсулотларини тақдим этиш ва сотишга ёрдам бериш учун Ўзбекистоннинг чет элдаги дипломатик ваколатхоналари бириктирилади.
Ҳужжатга мувофиқ, халқ амалий санъати усталарининг миллий каталоги жорий этилади; туризм соҳасида фаолият юритаётган ҳунармандлар реестри ўтказилади; халқ амалий санъати усталарининг миллий каталогига киритиш учун номзодларни танлаш бўйича кенгаш ташкил этилади.
2020 йил 1 январдан бошлаб миллий каталог ва реестрга киритилган ҳунармандлар 2023 йил 1 январга қадар якка тартибдаги тадбиркорлар сифатида 2% ставка бўйича ягона солиқ тўловини тўлайдилар, бунда календар йил давомида маҳсулот (ишлар, хизматлар)ни сотишдан тушган тушуми 100 млн. сўмдан ортиқ ва 1 млрд сўмдан ошмаган бўлса; ҳунармандчилик фаолиятининг асосий йўналишлари бўйича якка тартибдаги тадбиркорлик фаолиятини юритиш учун белгиланган давлат божи миқдорининг 50 фоизи давлат божи миқдори янги давлат рўйхатидан ўтказилганлиги учун давлат божи миқдори белгиланади; миллий каталогга киритилган ҳунармандларга нисбатан ўқувчилар сони бўйича чекловлар бекор қилинади.
Бундан ташқари, қарор билан ҳунармандчилик соҳасини келгусида ривожлантириш бўйича йўл харитаси тасдиқланди.
Сурат манбаи: advantour.com
