Ўзбекистон давлат герби тасдиқланган кунга бағишлаб китоб кўргазмаси ташкил этилди

Тошкент. 4 июл. ЎзТАГ – Яқинда Ўзбекистон Миллий кутубхонасида Ўзбекистон давлат герби тасдиқланган кунга бағишланган китоб кўргазмаси ташкил этилди. Бундан 22 йил олдин, 1992 йилнинг 2 июлида “Ўзбекистон Республикаси Давлат герби тўғрисида” қонун қабул қилинган эди, дея хабар беради Ўзбек телеграф агентлиги (ЎзТАГ).
Ҳар бир мустақил мамлакат, шу жумладан, Ўзбекистон ҳам ўзининг алоҳида давлат рамзлари, хусусан, байроғи, герби ва мадҳиясига эга.
Ўзбекистон Республикаси Давлат гербида гуллаган водий узра нур сочаётган офтоб, баланд тоғлар оралаб оқаётган дарёлар, гербнинг сўл томонидаги буғдой бошоқлари, ўнг томонидаги қийғос очилган ғўза ифодаланган чамбар акс этган. Гербнинг юқори қисмида элу-юрт жипслигининг рамзи сифатида саккиз қиррали юлдуз, герб марказида эса қанотларни ёзиб турган Хумо қуши тасвирланган бўлиб, у бахт ва эрксеварлик тимсолидир. Гербнинг қуйисида мамлакат давлат байроғи рамзи бўлган чамбаракни ўраган лентада “O'ZBEKISTON” деган ёзув мавжуд.