Ўзбекистон Давлат солиқ қўмитаси чорвачиликка доир имтиёзларнинг бекор қилиниш сабабларини тушунтирди

Тошкент. 4 апрель. ЎзТАГ –  Ўзбекистон Давлат солиқ қўмитаси чорвачиликда банд бўлган мутахассис ва ишчиларга ер солиғи бўйича берилган имтиёзларнинг бекор қилиниш сабабларини тушунтирди, дея хабар беради Ўзбек телеграф агентлиги (ЎзТАГ).
Қўмита матбуот хизмати томонидан эълон қилинган хабарга кўра, ушбу имтиёзлар фермер хўжаликлари олдига қўйилган янги вазифалар туфайли ўз долзарблигини йўқотган. Чунки ушбу имтиёз мамлакат мустақиллигининг илк йилларида чорвачиликка қизиқишни ошириш мақсадларида берилган эди. Бугунда эса ҳукумат озиқ-овқат хавфсизлигини таъминловчи фермерлик хўжаликларини ривожлантиришга катта эътибор бермоқда.
Имтиёзнинг бекор қилингани 2014 йил 1 апрелдан бошлаб чорвачиликда банд бўлган мутахассис ва ишчилар ҳам жисмоний шахсларга солинадиган ер солиғини умумбелгиланган тартибда тўлашларини англатади.
Эслатиб ўтамизки, чорвачиликда банд бўлган мутахассис ва ишчиларга ер солиғи бўйича имтиёз 1993 йил 6 майдаги “Ер солиғи тўғрисидаги” Қонунга биноан жорий этилган эди. Имтиёз юқорида кўрсатилган тоифадаги шахсларнинг фақат якка тартибда уй жой қуриш ва деҳқон хўжалигини юритиш учун ажратиладиган ер майдонларигагина тааллуқли эди.