Ўзбекистон “Doing Business”даги ўз мавқеини “бизнесни рўйхатга олиш” кўрсаткичи бўйича 22 пунктга яхшилади
Тошкент. 25 апрел. ЎзТАГ – Ўзбекистон Жаҳон банкининг янги “Doing Business” маърузасидаги ўз мавқеини “бизнесни рўйхатга олиш” кўрсаткичи бўйича 22 пунктга яхшилади, деб хабар беради Ўзбек телеграф агентлиги (ЎзТАГ).
БМТТД идорасидан хабар беришларча, агар 2015 йилда республика рейтингда 65 ўринни эгаллаган бўлса, сўнгги ҳисоботда мамлакат 42 поғонада.
БМТТД “Ўзбекистон бизнес-форуми (III фаза)” лойиҳаси экспертлари ушбу кўрсаткичнинг кескин ўсишини қатор омиллар билан боғлашмоқда.
Хусусан, 2014 йилда тадбиркор ўз бизнесини рўйхатдан ўтказиши учун 7та амалиётдан ўтиши шарт бўлган (2015 йилда бу амалиётлар сони 5тага туширилди) ва ўртача 7,5 кун вақт эгаллаган (2015 йилда – 6,5 кун) бўлиб, пулга чаққанда аҳоли бошига йиллик 3,3% (2015 йилда – 3,4%) даромадга тенг бўлган.
Мамлакатда тадбиркорлик субъектларини Интернет орқали давлат рўйхатидан ўтказиш механизмининг йўлга қўйилди. Янги ташкил этилаётган тадбиркорлик субъектларини рўйхатга олиш билан бир вақтда, ваколатли орган томонидан солиқ ва статистика органларида ҳисобга қўйиш тартиби жорий этилган.
Бундан ташқари, тадбиркорлик субъектларини давлат рўйхатидан ўтказиш хизматининг Ягона давлат хизматлари интерактив порталида жорий қилиниши ҳам хизматдан фойдаланишни соддалаштирди.
Бошланғич маълумотларга кўра, Ўзбекистонда бизнесни рўйхатдан ўтказиш икки босқичда амалга оширилиши мумкин (биринчиси – реал вақт режимида, оптималлаштирилган тартибда рўйхатдан ўтказиш, иккинчиси – банк ҳисоб рақами очиш).
