Ўзбекистон Экспортни қўллаб-қувватлаш жамғармасининг низом капитали 3 бараварга кўпайтирилди

Тошкент. 13 апрел. ЎзТАГ – Ўзбекистон ЎМБ ҳузуридаги Кичик бизнес ва хусусий тадбиркорлик субъектлари экспортини қўллаб-қувватлаш жамғармасининг низом капитали 3 бараварга кўпайтирилиб, 5 млрд 300 млн сўмдан 10 млрд сўм ва $2 млнга етказилди, деб хабар беради Ўзбек телеграф агентлиги (ЎзТАГ).

Ушбу маълумотлар жамғарманинг янги имкониятларига доир тадбиркорлар билан бўлган учрашувида келтирилди. Очилган янги имкониятлар орасида жамғарма салоҳиятининг хорижий мамлакатларда очилган ваколатхоналари орқали молия хизматлари кўрсатиш ҳам бор.

Шунингдек, жамғарма экспорт молиялаштиришини амалга ошириши, экспортбоп маҳсулотлар ишлаб чиқаришга имкон бўлмаган кичик бизнес ва хусусий тадбиркорлик субъектлари низом капиталида иштирок этиши (кейинчалик улушни бозор баҳосида уч йил ичида сотиш шарти билан) мумкин.

Бундан ташқари, жамғарма кичик бизнес ва хусусий тадбиркорлик субъектлари, фермер хўжаликларига молия кўмаги кўрсатиши мумкин. Бу кўмак ишлаб чиқаришни кенгайтириш ва модернизация қилиш, маҳсулот дизайнини халқаро стандартларга етказиш мақсадида хорижий мутахассисларни таклиф қилиш билан боғлиқ харажатлар қисмида кўрсатилиши мумкин.

Жамғармадан маълум қилишларича, янги имкониятлар мамалкат президентининг 2507 сонли “Кичик бизнес ва хусусий тадбиркорлик субъектлари экспортини қўллаб-қувватлаш жамғармаси фаолиятини янада такомиллаштириш чоралари тўрисида”ги қароридан кейин очилди.