Ўзбекистон энергетика вазири МАГАТЭ делегацияси билан учрашув ўтказди
Тошкент. 6 феврал. ЎзТАГ – 5 февралда Тошкентда Ўзбекистон Энергетика вазири Алишер Султоновнинг Халқаро атом энергетикаси агентлиги (МАГАТЭ) делегацияси аъзолари билан учрашуви бўлиб ўтди, деб хабар беради Ўзбек телеграф агентлиги (ЎзТАГ).
Делегация Ўзбекистон в Узбекистане МАГАТЭ семинари доирасида бўлиб турибди. Унда “Ўзатом” ва бошқа ташкилотлар вакиллари иштирок этишмоқда.
“Ўзатом” агентлиги матбуот хизматидан хабар беришларича, учрашувда атом энергетикаси фаолиятининг йўлга қўйилиши нафақат энергетика ривожи, балки фан, кадрларни тайёрлаш каби соҳаларнинг жадал ривожланишига олиб келиши, мамлакатнинг қишлоқ хўжалиги, тиббиёт, қурилиш йўналишларидаги имконияти бир неча бараварга ошиши таъкидланди. Тажрибага кўра, ушбу тармоқнинг ривожланиши кўплаб бошқа соҳалар учун катализатор бўлиб хизмат қилади.
Учрашувда қайд этилганидек, кадрларни тайёрлаш масаласига катта эътибор қаратилмоқда. Ҳозирда ўзбекистонлик 58 талаба “Москва муҳандислик-физика институти” миллий тадқиқот ядровий университетида таълим олмоқда. Тошкентда мазкур университетнинг филиалини ташкил қилишга доир ишлар олиб борилмоқда, бу ерда Ўзбекистоннинг ядро энергетикаси соҳаси учун кадрлар тайёрланади.
АЭСни барпо этишга оид кенг кўламли ишлар доирасида МАГАТЭ билан ҳамкорлик ҳам янги босқичга кўтарилди. Халқаро агентлик билан ҳамкорликда ўтказилаётган семинар ҳам шу йўналишда олиб борилаётган муҳим ишлардан биридир.
“(…) Биз эса, ўз навбатида, сизни тўлиқ қўллаб-қувватлашга тайёрмиз, бундай ҳамкорлик лойиҳанинг барча хавфсизлик талабларига мувофиқ келишига ёрдам беради. Ўз зиммангизга МАГАТЭ талабларига мувофиқ бўлиш мажбуриятини олаётганлигингиз жуда муҳим. Биз ушбу стандартларни мамлакатингизда оммалаштиришга доир барча чораларни кўрамиз. Лойиҳангиз самарали ва хавфсиз бўлиши тарафдоримиз”, - деб таъкидлади Г.Жентковски.
Қайд этамиз, 2019 йилда Ўзбекистон ва МАГАТЭ ҳамкорлигининг 25 йиллиги нишонланади. Бугунга келиб ушбу ҳамкорлик алоқалари мамлакатда биринчи атом электр станцияси қурилиши муносабати билан янги босқичга чиқди.
Сурат манбаи: https://www.uzatom.uz
