Ўзбекистон енгил саноатида 31 инвестиция лойиҳасини амалга ошириш режалаштирилмоқда
Тошкент. 18 май. ЎзТАГ – 2015 йил охирига қадар Ўзбекистон енгил саноатида қиймати $231 млндан ошиқ 31 инвестиция лойиҳасини амалга ошириш режалаштирилмоқда, деб хабар беради Ўзбек телеграф агентлиги (ЎзТАГ).
“Бундан ташқари яқин тўрт йилда “Ўзбекенгилсаноат” ДАК етакчи хорижий ҳамкорлар билан биргаликда янги корхоналар ташкил қилиш ва амалдаги ишлаб чиқаришларни модернизация қилиш, техник ва технологик янгилаш бўйича 58 лойиҳани амалга ошириш ниятида. Хорижлик инвесторлар иштирокидаги яна 21 лойиҳа тайёргарлик жараёнида”, – деди ЎзТАГ мухбирига “Ўзбекенгилсаноат” ДАК инвестицияларни жалб қилиш бўлими бошлиғи Шоҳруҳ Раҳимов.
МДҲ, энг аввало, Россия Федерацияси, Европа Иттифоқи ва Жанубий Корея ўзбек текстиль маҳсулотларининг асосий экспорт бозорлари бўлиб қолмоқда. Араб мамлакатларига экспорт ҳам яхши истиқболларга эга. Кейинги пайтда ўзбек корхоналари ўзлари учун янги бўлган Жанубий Америка, Канада ва АҚШ бозорларини ҳам ўзлаштира бошладилар.
