Ўзбекистон Фарғона водийсидаги йўлларни электрлаштиришга $200 млндан зиёд маблағ ажратади

Тошкент. 20 октябр. ЎзТАГ – Ўзбекистон “Поп–Наманган–Андижон” темир йўлини электрлаштиришга $200 млндан зиёд маблағ ажратади, деб хабар беради Ўзбек телеграф агентлиги (ЎзТАГ).

Куни кеча Ўзбекистон президенти қурилишнинг асосий техник-иқтисодий кўрсаткичларини тасдиқлади.

“Қурилишнинг умумий қиймати $202 млндан ошади. Молиялаштириш Осиё тараққиёт банкининг $80 млнлик кредити, “Ўзбекистон темир йўллари”нинг ўз маблағи ($72 млн), “Ўзбекэнерго” ($11 млн) маблағи ҳисобига амалга оширилади. Яна республика ҳукумати $38 млн маблағни божхона имтиёзлари тарзида тақдим этади”, - деб таъкидланади лойиҳа ТИАсида.

Ушбу ташаббуснинг амалга оширилиши натижасида ҳавога чиқариладиган ис гази 10 минг тоннага қисқаради. Экспертларнинг баҳоларига кўра, электрификация ишлари якунлангач йўлда юк ташиш ҳажми йилига 962,6 млн тонна-кмгача, йўловчилар ташиш 32 млрд пасс-кмгача ошади.