Ўзбекистон Францияга экспортни яримдан кўпга оширди – Фекль

Тошкент. 21 июл. ЎзТАГ – 2015 йил якунлари бўйича Ўзбекистондан Францияга экспорт 60% ошиб, илк марта 160 млн еврони ташкил қилди. Ушбу маълумотлар Тошкентда бўлиб ўтган ўзбек-француз ҲАК йиғилишида француз делегацияси раҳбари Маттиас Фекль томонидан келтирилди, деб хабар беради Ўзбек телеграф агентлиги (ЎзТАГ).

Унинг сўзларига кўра, Франциянинг Ўзбекистонга экспорти 107 млн еврони ташкил қилган, бу кейинги 5 йилдаги ўртача кўрсаткичга тўғри келади. Ушбу тамойиллар 2016 йил бошидан бери ҳам сақланиб қолмоқда. Франция делегацияси раҳбарининг сўзларига кўра, ушбу йўналишда ҳали фойдаланилмаётган салоҳият мавжуд.

Тошкентга Савдо-иқтисодий ҳамкорлик бўйича ҳукуматлараро комиссия йиғилишида қатнашиш учун 20 атрофида бизнес-компаниялар вакиллари ташриф буюрдилар. Шунингдек, улар икки мамлакат тадбиркорларининг бизнес-форумида ҳам иштирок этдилар.

Маълумот ўрнида, 2015 йил якунлари бўйича иккитомонлама товар айланмаси $300 млндан ошди, жорий йилнинг I ярмида эса $150 млндан зиёдни ташкил қилди.

Бугунда Ўзбекистонда француз капитали иштирокида 15 корхона ишламоқда. Шунингдек, 11 француз компаниялари ваколатхонаси ҳам рўйхатга олинган.