Ўзбекистон Футбол федерацияси соҳани 2022 йилгача ривожланиш дастурини ишлаб чиқади
Тошкент. 15 сентябр. ЎзТАГ – 25 сентябрдан сўнг Ўзбекистон Футбол федерацияси жамоатчилик эътиборига ушбу спорт турида ислоҳотларни акс эттирувчи хужжатни тақдим қилиш ниятида, деб хабар беради Ўзбек телеграф агентлиги (ЎзТАГ).
“Ўзбекистон Футбол федерациясининг янги раҳбарияти болалар-ўсмирлар ва оммавий футболни янада ривожлантириш, миллий терма жамоаларнинг фаолиятини тубдан ислоҳ қилиш, футбол бўйича Ўзбекистон чемпионати савиясини кўтариш, кадрлар тайёрлаш ва уларнинг малакасини ошириш, халқ ва ишқибозлар билан мулоқот кўприкларини янада кўпайтириш бўйича чора-тадбирлар режаси ишлаб чиқяпти. Хужжат 2022 йилгача мўлжалланган бўлади”, - деб таъкидлашди Ўзбекистон Футбол Федерациясида.
Бундан ташқари, хужжат доирасида федерациянинг бўлинмалари таркибини қайта кўриб чиқиш ва маъмурий аппаратга футбол соҳасидаги етук мухассисларни жалб қилиш режалаштирилмоқда.
